周汶錡被批爛桃花冇嫁講
周汶錡（Kathy）的法籍未婚夫Julien Lepeu自被爆街頭狼吻樂壇新人張苡澂（Venus）後，Kathy連日「潛水」玩失蹤，Venus昨日與風水師女友七仙羽行街散心，七仙羽更自爆從朋友口中得知Kathy與Julien「吵大鑊」而分手收場，更直指Kathy經常遇「爛桃花」，感情難有結果，Venus即自稱做了「替死鬼」！
Venus與Julien的「狼啜風波」令她情緒大受影響並失眠，昨日Venus與好友七仙羽在銅鑼灣逛街散心，之後到一泰式餐廳坐下閒聊，一臉愁容似盡吐苦水，記者即上前追問Venus與Julien的緋聞，Venus先愕然，然後便趁機為自己討回清白，她說：「同Julien表現好sweet？我有推開佢㗎，啲朋友叫我應該打佢一巴，但我係有修養嘅女仔，唔做朋友咪少啲來往，點可以打人？況且佢都唔係我男友。」
張苡澂呼冤枉 對於Kathy與Julien因今次事件分手，結束四年情，令Venus頓變「罪魁禍首」，她委屈地說：「世界真係太恐怖！如果因為我而分手我良心都過意唔去，但可以令Kathy認清楚呢個人都係好事，我都希望佢搵到好男人錫佢，去享受真正愛情，唔係擔驚受怕。（怕唔怕被指『狐狸精』？）唉！搞到我好似搶人男友咁，如果真係拍拖就話啫，根本唔係，好冤枉。」
不過，Venus表示不擔心跟Kathy碰面，屆時更會大方打招呼：「我冇得罪佢，冇搶佢男友。（Julien可能同Kathy解釋話係你採取主動？）唔排除有人咁講，但如果主動，我就唔推開佢啦。」Venus坦言即使Julien回復單身，亦絕不會接受他。
Venus又笑罵好友七仙羽才是罪魁禍首，因是她介紹Julien予自己認識，七仙羽謂：「我係罪人囉咁！我有問Julien係咪有model女友，佢就話同Kathy時好時壞，試過分手一年又復合，根本唔開心。」
玩潛水避風頭
七仙羽又稱與Julien是好友，亦曾為對方睇相及睇掌，她稱Julien手掌不硬不軟，代表性格花弗。談到Kathy和Julien分手一事，七仙羽即言：「就算冇Venus，佢哋遲早都散，因為佢哋八字唔夾，Kathy同Julien都多桃花，我知Kathy好恨結婚，桃花係多，但都係爛桃花，一埋尾就唔成事，會有好多波折，雖然容易散，但好快又會有拖拍。」在旁的Venus便說：「我即係做咗佢哋替死鬼。」之後Venus在Blog上更以《地獄的吶喊》來宣洩情緒。 近日Kathy一直未見「蒲頭」，記者連日致電Kathy及其助手，不是沒人接聽便是轉駁至留言信箱。而Kathy前經理人周珍妮對兩人傳分手感意外，並稱因沒有合作已很少聯絡。 文：音樂組
沒有留言:
張貼留言